ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᒥᐅᓄᑦ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᒐᓱᐊᕈᑕᐅᓂᖓ

ᑐᙵᓱᒋᑦ ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᒥᐅᓄᑦ ᐱᔾᔪᑎᓪᓗᒍ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᒐᓱᐊᕈᑕᐅᓂᖓᓄᑦ ᖃᕋᓴᐅᔭᒃᑯᑦ ᑐᑭᓯᒋᐊᕈᑎᖃᕐᕕᒻᒧᑦ

ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᒥᐅᓄᑦ ᑲᓇᑕᒥ ᐃᑲᔫᑎ ᒐᕙᒪᑐᖃᒃᑯᓐᓂᑦ ᐱᓇᓱᐊᕈᑕᐅᓯᒪᒻᒪᑦ ᐊᑑᑎᖃᕈᒫᕐᓂᐊᕐᓯᒪᓪᓗᓂ ᐃᑲᔫᑎᐅᓗᓂ ᐊᑭᑐᔪᕐᔪᐊᕌᓘᕙᒻᒪᑕ ᓂᕿᑖᖑᐃᓐᓇᕆᐊᖃᕐᐸᑦᑐᑦ ᐊᒻᒪᓗ ᓂᕿᐅᙱᑦᑑᒐᓗᐊᑦ ᓂᐅᕕᐊᔅᓴᐅᕙᑦᑐᑦ ᑲᓇᑕᒥ ᐅᑭᐅᖅᑕᖅᑐᒥᐅᑦ ᓄᓇᖃᕐᕕᖏᓐᓂ. ᑖᒃᑯᐊ Northern ᐅᑭᐅᖅᑕᖅᑐᒥ ᓂᐅᕕᕐᕕᖁᑎᓖᑦ, ᐃᓚᒋᔭᐅᓪᓗᑎᒃ ᐅᑯᐊ North West Company, ᑮᓇᐅᔭᖅᑖᖃᑦᑕᕐᖓᑕ ᑕᕝᕘᓇ ᐃᑲᔫᑎᑎᒍᑦ (“ᐃᑲᔫᑏᑦ ᑮᓇᐅᔭᑦ”), ᑖᒃᑯᐊ ᐊᖏᖃᑎᒌᒍᑎᒋᓯᒪᔭᖏᑎᒍᑦ ᑳᓐᑐᓛᒃᑯᑦ ᑲᒪᒋᔭᔅᓴᖃᕐᖓᑕ ᑲᔪᓯᑎᑦᑎᔭᕆᐊᖃᖅᑐᑎᒃ ᓂᐅᕕᕆᐊᕐᐸᑦᑐᓄᑦ.

ᑖᓐᓇ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᒍᑕᐅᒍᒪᔪᖅ ᐸᓯᔭᔅᓴᐅᓂᕋᐃᒻᒪᑦ ᑖᒃᑯᐊ ᓂᐅᕕᖅᑎᒃᑯᑦ The North West Company ᐊᒻᒪᓗ ᑎᒥᖁᑎᖏᑦ ᒪᓕᒐᕐᓂᑦ ᒪᓕᑦᑎᐊᕋᑎᒃ ᑮᓇᐅᔭᒐᓴᕐᔪᐊᕌᓗᓐᓂᑦ ᒥᓕᐊᓐᖏᓐᓃᑦᑐᓂᑦ ᐱᓯᒪᑦᑎᑐᐃᓐᓇᕐᓯᒪᒻᒪᑕ ᐃᑲᔫᑎᓂᑦ, ᑭᒡᒐᖅᑐᐃᒍᑎᖃᕐᓂᕋᕋᓗᐊᖅᑎᓪᓗᒋᑦ ᐊᑐᕐᓯᒪᓂᕋᖅᑐᑎᒃ ᐃᑲᔫᑎᓂᑦ ᐃᓘᓐᓇᖏᓐᓂᒃ ᐊᑭᑭᓪᓕᒋᐊᕐᓯᒪᖃᑦᑕᓂᐊᕐᖓᑕ ᓂᖀᑦ ᐅᑭᐅᖅᑕᖅᑐᒥᐅᓄᑦ ᓂᐅᕕᕆᐊᕐᐸᑦᑐᓄᑦ ᑕᐃᒫᒃ ᐱᔭᕆᐊᖃᕐᓯᒪᒻᒪᑕ ᐃᑲᔫᑏᑦ ᒪᓕᑦᑐᒋᑦ. ᐸᓯᑦᑎᒍᑕᐅᓯᒪᔪᑦ ᐃᖅᑲᖅᑐᐃᕕᒃᑎᑦᑎᔫᑉ ᓇᓗᓇᐃᕐᓯᒍᑎᖏᓐᓂ ᐃᖅᑲᖅᑐᐃᕕᒻᒥ ᑲᒪᒋᔭᐅᓚᐅᕐᓯᒪᙱᑦᑐᑦ.