ᐊᐱᖅᑯᑕᐅᒐᔪᓐᓂᕐᐹᑦ

ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᒐᓱᓐᓂᖅ ᑖᓐᓇ ᐃᖅᑲᖅᑐᕋᔅᓴᕈᖅᑎᑦᑎᒍᑕᐅᓲᖑᒻᒪᑦ ᐊᑕᐅᓯᕐᒧᑦ ᐅᕝᕙᓘᓐᓃᑦ ᐊᒥᓲᓂᕐᓴᓄᑦ ᐱᔾᔪᑎᒋᓪᓗᒋᑦ ᐊᒥᓱᑦ ᐊᑕᐅᑦᑎᒦᑦᑐᑦ ᐅᖃᐅᓯᖃᕐᓯᒪᑎᓪᓗᒋᑦ ᑕᒪᔅᓱᒥᖓᔅᓴᐃᓐᓇᖅ ᒪᓕᒐᖅᑎᒍᑦ ᐊᒻᒪᓗ/ᐅᕝᕙᓘᓐᓃᑦ ᐊᑐᓪᓚᑦᑖᕐᓯᒪᔪᓂᑦ ᐊᑲᐅᙱᓕᐅᕈᑕᐅᔪᓂᑦ. ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᒐᓱᓐᓂᖅ ᐊᑐᕈᓐᓇᑎᑦᑎᓲᖅ ᐊᑭᑭᓐᓂᕐᓴᐅᓪᓗᓂ ᑲᑐᔾᔨᖃᑎᒌᑦᑐᓄᑦ ᑕᒪᔅᓱᒥᖓᔅᓴᐃᓐᓇᖅ ᐱᓇᓱᐊᕈᑎᖃᕈᒪᓯᒪᔪᓄᑦ ᒪᓕᒐᖅᑎᒍᑦ ᐃᖅᑲᖅᑐᕋᔅᓴᕈᖅᑎᑦᑎᒍᒪᔪᓄᑦ.

ᑕᐃᒫᒃ ᐱᕕᖃᖅᑎᑎᓪᓗᑎᒃ ᐊᒥᓱᓂᑦ ᑭᒃᑯᑐᐃᓐᓇᕐᓂᑦ ᓯᕗᒧᐊᑦᑎᑦᑎᓂᕐᒧᑦ ᐊᔾᔨᒌᐸᓗᑦᑐᓂᑦ ᒪᓕᒐᖅᑎᒍᑦ ᐸᓯᔭᔅᓴᐅᓂᕋᐃᓂᕐᒧᑦ ᐊᑕᐅᓯᕐᒥᒃ ᐱᓂᐊᕈᑎᖃᕐᓗᑎᒃ, ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᒐᓱᓐᓂᖅ ᐸᓚᕐᔫᒥᑎᑦᑎᓂᕐᓴᐅᓲᑦ ᒪᓕᒐᖅᑎᒍᑦ ᓵᙵᔭᐅᔾᔪᑎᒋᔪᓐᓇᖅᑕᖓᓂᒃ ᑭᓇᑐᐃᓐᓇᐅᑦ ᐊᒻᒪᓗ ᑲᑐᔾᔨᒍᑕᐅᔪᓐᓇᓲᖑᒻᒪᑦ ᐊᑭᒋᒐᔭᖅᑕᖏᓐᓂᒃ ᓵᙵᔭᐅᔾᔪᑎᒋᔪᓐᓇᖅᑕᖓᑕ. ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᒐᓱᓐᓂᖅ ᑕᐃᒪᐃᒻᒪᑦ ᑭᒃᑯᑐᐃᓐᓇᕐᓄᑦ ᐊᑐᕈᓐᓇᑎᑦᑎᓲᑦ ᐊᑑᑎᕕᐅᔪᓄᑦ ᐱᓂᐊᕈᑎᒋᓯᒪᔭᖏᓐᓄᑦ ᐊᖏᔫᑏᑦ, ᓱᓇᒃᑯᑖᖃᑦᑎᐊᖅᑐᑦ ᑎᒥᐅᔪᑦ ᐋᖅᑭᒋᐊᕐᓯᖁᓪᓗᒋᑦ ᒪᓕᒐᖅᑎᒍᑦ ᓈᒻᒪᑦᑐᓕᕕᑦᑎᒍᑦ.  

ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᒥᐅᓄᑦ ᑲᓇᑕᒥ ᐃᑲᔫᑎ ᑖᓐᓇ ᒐᕙᒪᑐᖃᒃᑯᓐᓂ ᐱᓇᓱᐊᕈᑕᐅᓯᒪᔪᖅ ᐊᔪᕐᓇᖏᓐᓂᕐᓴᐅᖁᓪᓗᒍ ᐃᓅᓯᖅ ᐅᑭᐅᖅᑕᖅᑐᒥᐅᓄᑦ ᓄᓇᓕᓐᓄᑦ ᐊᒻᒪᓗ ᐊᑭᑭᔾᔫᒥᓂᕐᓴᐅᖁᓪᓗᒍ. ᐊᑑᑎᖃᓗᐊᙳᐊᖅᑐᖅ ᓂᕿᑦᑎᐊᕙᓕᕆᓂᖅ ᐅᑭᐅᖅᑕᖅᑐᒥᐅᓄᑦ ᑲᓇᑕᒥ ᐃᑲᔫᑎ ᑖᒃᑯᐊ ᐃᑲᔫᑏᑦ ᐊᑭᓕᐅᑕᐅᕙᑦᑐᓄᑦ, ᐊᑭᑭᓪᓕᒋᐊᕐᓯᒪᔪᓐᓇᓂᐊᕐᖓᑕ ᐃᓚᖏᑦ ᓂᐅᕕᐊᖑᐃᓐᓇᕆᐊᖃᕐᐸᑦᑐᑦ ᓂᖀᑦ ᐊᒻᒪᓗ ᓂᕿᐅᙱᑦᑑᒐᓗᐊᑦ ᓂᐅᕕᐊᔅᓴᐅᕙᑦᑐᑦ ᐅᑭᐅᖅᑕᖅᑐᒥ ᓂᐅᕕᕆᐊᕐᐸᑦᑐᓄᑦ. ᓂᐅᕕᕐᕖᑦ ᓲᕐᓗ ᑖᒃᑯᐊ The North West Company ᐊᒻᒪᓗ ᑎᒥᖁᑎᖏᑦ ᑮᓇᐅᔭᖃᖅᑎᑕᐅᓂᖏᓐᓄᑦ ᐊᖏᖃᑎᒌᒍᑎᖃᕐᐸᒻᒪᑕ ᑖᒃᑯᓄᖓ ᑲᓇᑕᒥ−ᓄᓇᖃᖅᑳᖅᑐᓄᑦ ᐃᓄᓕᕆᔨᑐᖃᒃᑯᓐᓄᑦ ᑲᓇᑕᒥ ᐃᑲᔫᓯᐊᖅᑖᕈᓐᓇᓂᐊᕐᖓᑕ ᐃᑲᔫᑎᓂᑦ. ᑮᓇᐅᔭᖃᖅᑎᑕᐅᓂᖏᓐᓄᑦ ᐊᖏᖃᑎᒌᒍᑏᑦ ᓂᐅᕕᕐᕕᓐᓄᑦ ᐃᑲᔫᓯᐊᖅᑖᕈᑕᐅᔪᓐᓇᐸᒻᒪᑕ ᐃᑲᔫᑎᓂᑦ ᑖᒃᑯᐊᓗ ᐊᑑᑎᒋᐊᖃᕐᐸᑦᑐᑎᒃ ᑲᔪᓯᓗᑎᒃ ᐊᑭᓕᒫᖏᓐᓄᑦ ᐃᑲᔫᑏᑦ ᐅᑭᐅᖅᑕᖅᑐᒥ ᓂᐅᕕᕆᐊᕐᐸᑦᑐᓄᑦ. 

ᐃᑲᔫᑏᑦ ᐊᑐᐃᓐᓇᐅᑎᑕᐅᔪᑦ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᑲᓇᑕᒥ ᑐᕌᖓᓯᒪᒻᒪᑕ ᐋᖅᑭᔾᔫᒥᓂᐊᕐᖓᑦ ᓂᕿᔅᓴᖃᑦᑎᐊᖃᑦᑕᖏᓐᓂᖅ ᐊᑲᐅᙱᓕᐅᕈᑕᐅᓪᓚᕆᑦᑐᖅ ᑲᓇᑕᒥ ᐅᑭᐅᖅᑕᖅᑐᒥᐅᓄᑦ ᓄᓇᓕᓐᓄᑦ. ᓂᕿᑦᑎᐊᕙᐃᑦ ᐊᑭᑐᓂᕐᓴᒻᒪᕆᐅᒻᒪᑕ ᐅᑭᐅᖅᑕᖅᑐᒥ ᓄᓇᓕᓐᓂᑦ, ᑕᒪᓐᓇ ᐱᒡᒐᓇᕐᓯᖃᑦᑕᕐᖓᑦ ᐅᑭᐅᖅᑕᖅᑐᒥᐅᓄᑦ ᓂᐅᕕᕋᓱᒋᐊᔅᓴᖅ ᓈᒻᒪᔾᔫᒥᓂᔪᓂᑦ ᓂᕿᑦᑎᐊᕙᓐᓂᑦ ᐃᒻᒥᓄᑦ ᐃᓚᖏᓐᓄᓪᓗ. ᓂᕿᔅᓴᖃᑦᑎᐊᖃᑦᑕᖏᓐᓂᖅ ᒪᑯᓇᙵᑦ ᐱᔾᔪᑎᖃᖃᑦᑕᕐᖓᑦ ᖃᓄᐃᑦᑐᑐᐃᓐᓇᑦᑎᐊᓂᑦ ᓈᒻᒪᖏᑦᑐᓂᑦ ᐊᑑᑎᓂᖃᕐᐸᑦᑐᓂᑦ, ᐃᓚᒋᔭᐅᓪᓗᑎᒃ ᐊᒥᓲᓂᕐᓴᐅᕙᑦᑐᑎᒃ ᓂᕆᒡᒐᐃᓐᓇᕐᐸᑦᑐᑦ, ᐋᓐᓂᐊᓕᕐᐸᑦᑐᑦ, ᖃᓂᒻᒪᓯᕐᑖᐸᑦᑐᑦ, ᖁᐃᓂᓗᐊᕐᐸᑦᑐᑦ, ᐅᖁᒪᐃᓪᓕᐅᕈᑎᖃᕐᐸᑦᑐᑦ, ᐃᓅᖃᑎᖏᓐᓄᑦ ᐃᓚᒋᔭᐅᑎᑕᐅᖃᑦᑕᖏᑦᑐᑦ, ᓄᒫᑦᑕᔅᓯᒪᕙᑦᑐᑦ, ᐊᒻᒪᓗ ᐃᓅᓯᕐᒥᒃ ᓴᐱᓕᕋᔭᕆᐊᔅᓴᖅ ᐃᓱᒪᖃᕐᐸᑦᑐᑦ. ᐃᑲᔫᑏᑦ ᐊᑐᓕᖅᑎᑕᐅᓯᒪᒻᒪᑕ ᑲᒪᒋᔭᖃᕆᐊᕈᒪᓪᓗᑎᒃ ᑕᒪᑐᒥᖓ ᐊᑲᐅᙱᓕᐅᕈᑕᐅᓪᓚᕆᑦᑐᒥᒃ ᓇᒥᓕᒫᖅ ᐊᑭᑭᓪᓕᒋᐊᖅᑎᑕᐅᓗᑎᒃ ᐊᑭᒋᕙᑦᑕᖏᑦ ᐃᓚᖏᑦ ᓂᐅᕕᐊᔅᓴᐅᕙᑦᑐᑦ (ᐱᓗᐊᖅᑐᒥᑦ, ᓂᕿᑦᑎᐊᕙᐃᑦ) ᐅᑭᐅᖅᑕᖅᑐᒥᐅᓄᑦ ᓂᐅᕕᕆᐊᕐᐸᑦᑐᓄᑦ.

ᑖᓐᓇ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᓇᓱᐊᕈᑕᐅᔪᖅ ᐸᓯᔭᔅᓴᐅᓂᕋᐃᒻᒪᑦ ᑖᒃᑯᓂᖓ ᓂᐅᕕᖅᑎᑯᓐᓂᒃ The North West Company ᐱᕋᔭᑦᑐᑎᒃ ᐱᓯᒪᑦᑎᑐᐃᓐᓇᕐᓯᒪᒻᒪᑕ ᑮᓇᐅᔭᒐᓴᕐᔪᐊᕌᓗᓐᓂᑦ ᒥᓕᐊᓐᖏᓐᓃᑦᑐᓂᑦ ᑮᓇᐅᔭᖅᑖᕆᓯᒪᔭᖏᓐᓂᒃ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥᐅᓄᑦ ᐃᑲᔫᑎᓂᑦ−ᑭᒡᒐᖅᑐᐃᒍᑎᖃᕆᐊᖃᕐᓯᒪᒐᓗᐊᖅᑎᓪᓗᒋᑦ ᐃᓘᓇᖏᓐᓂᒃ ᐃᑲᔫᑎᓂᑦ ᑲᔪᓯᑎᑦᑎᓪᓗᑎᒃ−ᓂᐅᕕᕆᐊᕐᐸᑦᑐᓄᑦ−ᑕᐃᒪᐃᒻᒪᑦ ᐅᑭᐅᖅᑕᖅᑐᒥᐅᓄᑦ ᐊᑑᑎᑎᑦᑎᓯᒪᒐᑎᒃ ᑮᓇᐅᔭᓂᑦ ᐊᑐᕆᐊᖃᕐᓯᒪᔫᒐᓗᐊᓂᑦ ᐊᑭᑭᓪᓕᒋᐊᕐᓯᒪᒍᑎᔅᓴᖏᓐᓂᒃ ᓂᕿᔅᓴᖃᑦᑎᐊᖃᑦᑕᖏᓐᓂᕐᒧᑦ ᐊᑲᐅᙱᓕᐅᕈᑎᖃᓪᓚᕆᑦᑐᓂᑦ ᐅᑭᐅᖅᑕᖅᑐᒥ ᑲᓇᑕᒥ. ᑖᓐᓇ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᓇᓱᐊᕈᑕᐅᔪᖅ ᐅᑎᖅᑎᑦᑎᒍᑕᐅᖁᔭᐅᓯᒪᔪᑦ ᓈᒻᒪᖏᓪᓚᕆᑦᑐᒥᒃ ᐊᑐᕈᑕᐅᔪᓄᑦ ᑕᐃᒪᓐᓇᓪᓗᐊᓂᑦ ᐃᑲᔫᓯᐊᖅᑖᕆᓯᒪᔭᖏᓐᓂᒃ ᐱᓯᒪᔭᐅᑐᐃᓐᓇᕐᓂᕋᕐᓯᒪᔭᖏᓐᓂᒃ ᓂᐅᕕᖅᑎᑯᓐᓄᑦ The North West Company. ᓈᒻᒪᔪᑦ ᑎᑎᕋᕈᑕᐅᓯᒪᔪᑦ ᐃᖅᑲᖅᑐᐃᕕᒃᑰᑎᑦᑎᔪᑦ ᐸᓯᔭᔅᓴᐅᓂᕋᐃᒍᑎᖏᑦ ᐅᖃᓕᒫᖅᑕᐅᔪᓐᓇᖅᑐᑦ ᐃᖅᑲᖅᑐᐃᕕᒃᑰᑎᑦᑎᒍᑎᒋᔪᒪᔭᖏᓐᓂᒃ, ᑎᑎᕋᖅᑕᐅᓯᒪᔪᓂᑦ ᕖᕝᕗᐊᓕ 5, 2025ᖑᑎᓪᓗᒍ, ᑕᕝᕙᓂ ᐱᔭᔅᓴᐅᓪᓗᑎᒃ ᖃᕋᓴᐅᔭᒃᑯᑦ ᐅᕙᓂ.

(ᒫᓐᓇᓕ, ᐅᐱᓐᓇᕋᓂ, ᐸᓯᑦᑎᒍᑕᐅᓯᒪᔪᑦ ᐃᖅᑲᖅᑐᐃᕕᒃᑰᑎᑦᑎᒍᑎᒋᔪᒪᓯᒪᔭᖏᓐᓂᒃ ᑕᐃᒫᒃ ᐃᖅᑲᖅᑐᐃᕕᒻᒥ ᐆᑐᖅᑕᐅᓚᐅᕐᓯᒪᙱᑦᑐᑦ.)

ᐃᖅᑲᖅᑐᐃᕕᓕᐊᕈᔾᔨᓯᒪᔪᑦ (ᐅᕝᕙᓘᓐᓃᑦ “ᑭᒡᒐᖅᑐᐃᓪᓗᑎᒃ ᐃᖅᑲᖅᑐᐃᕕᒃᑰᑎᑦᑎᒍᓯᒪᔪᑦ”) ᓇᓕ ᑕᑉᑕᖁᑦ ᑯᓱᒐᖅ, ᒪᓚᐃᔭ ᖃᐅᓂᖅ ᓵᑉᒪᓐ, ᐊᒻᒪᓗ ᐃᓴᕕᐅᓪ ᒫᒃ ᓴᐸᑑ ᑖᒃᑯᐊ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᒍᑎᖃᕈᒪᓯᒪᔪᑦ ᐱᔾᔪᑎᒋᓪᓗᒋᑦ ᐃᖅᑲᖅᑐᐃᕕᒃᑰᑎᑦᑎᓂᕐᒧᑦ ᐃᓚᒋᔭᐅᓂᕋᖅᑕᖏᑦ.

ᐃᖅᑲᖅᑐᐃᕕᒃᑰᑎᑦᑎᓂᕐᒧᑦ ᐃᓚᒋᔭᐅᓂᕋᖅᑕᖏᑦ ᑖᒃᑯᐊ ᑖᒃᑯᐊᖑᕗᑦ ᑕᒪᕐᒥᒃ ᑭᒃᑯᑐᐃᓐᓇᐃᑦ ᑎᒥᐅᔪᓪᓗ ᓂᐅᕕᕐᓯᒪᔪᑦ ᓂᐅᕕᐊᔅᓴᐅᒐᔭᖅᑐᓂᑦ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᐃᑲᔫᑎᑎᒍᑦ ᑖᒃᑯᓇᙵᑦ ᓂᐅᕕᖅᑎᑯᓐᓂᑦ The North West Company ᐊᒻᒪᓗ ᑎᒥᖁᑎᖏᑦ (ᐅᑯᐊᖑᓪᓗᑎᒃ, ᑭᓪᓕᖃᙱᑦᑐᑦ ᑖᒃᑯᓄᖓ, ᐅᑭᐅᖅᑕᖅᑐᒥ ᓂᐅᕕᕐᕖᑦ Northern Stores, NorthMart, Valu Lots, ᐊᒻᒪᓗ QuickStop) ᐄᐳᓗ 1, 2011ᒥ ᒫᓐᓇᒧᑦ ᑎᑭᑦᑐᒍ. 

ᐃᖅᑲᖅᑐᕋᔅᓴᐃᑦ ᑖᒃᑯᐊ ᓂᐅᕕᖅᑎᒃᑯᑦ The North West Company, ᑖᒃᑯᐊ ᐊᖏᓂᕐᐹᖑᓪᓗᑎᒃ ᐃᓚᒋᔭᐅᕗᑦ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᐃᑲᔫᑎᓄᑦ. ᐊᐅᓚᓂᖃᕐᐸᑦᑐᑦ ᑎᒥᖁᑎᖏᑦ ᐅᑯᐊ ᐅᑭᐅᖅᑕᖅᑐᒥ ᓂᐅᕕᕐᕖᑦ Northern Stores, NorthMart, ᐊᒻᒪᓗ Valu Lots, ᑖᒃᑯᐊ ᓂᐅᕕᖅᑎᒃᑯᑦ The North West Company ᓂᐅᕕᕐᕕᖁᑎᖃᐅᖅᑐᐊᓘᒻᒪᑕ ᐅᕝᕙᓘᓐᓃᑦ ᐊᐅᓚᑉᐸᑦᑕᖏᑦ−ᓂᐅᕕᕐᕕᖁᑎᖏᑦ ᓂᕿᓂᑦ ᓂᐅᕕᕐᕕᐅᕙᑦᑐᓂᑦ ᐊᒥᓱᓂᑦ ᐅᑭᐅᖅᑕᖅᑐᒥ ᓄᓇᓕᓐᓂᑦ. 

ᑖᒃᑯᐊ ᐃᖅᑲᖅᑐᐃᕕᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᓇᓱᐊᕈᑕᐅᔪᖅ ᒪᕐᕉᓐᓂᒃ ᐱᔾᔪᑎᖃᓗᐊᖅᑐᑦ ᑭᒃᑯᑐᐃᓐᓇᕐᓂᑦ ᐅᑭᐅᖅᑕᖅᑐᒥᐅᓂᑦ ᓄᓇᓕᓐᓂᑦ ᐊᑭᓖᑎᑕᐅᓗᐊᖃᑦᑕᕐᓯᒪᔪᓂᑦ ᑖᒃᑯᓇᙵᑦ ᐸᓯᔭᔅᓴᕈᖅᑎᑕᐅᓯᒪᔪᓂᑦ:

1)       ᐊᑐᕈᓐᓇᕐᓂᖅ ᒪᓕᒐᓕᕆᔨᓂᑦ ᓈᒻᒪᑦᑐᓕᖁᔨᓂᕐᒧᑦ: ᐱᓗᐊᖅᑐᒥᑦ, ᐊᑭᓕᖅᑕᐅᖁᓪᓗᒋᑦ ᑕᐃᒪᓐᓇᓪᓗᐊᖅ ᐊᑭᖏᓐᓂᒃ ᐃᑲᔫᓯᐊᖅᑖᖑᓯᒪᔪᑦ ᓂᐅᕕᖅᑎᑯᓐᓂᑦ The North West Company ᐸᓯᔭᐅᔾᔪᑎᖏᓐᓂᒃ ᐱᕋᔭᑦᑐᑎᒃ ᐱᓯᒪᐃᓐᓇᕐᓯᒪᔭᖏᓐᓂᒃ; ᐊᒻᒪᓗ,

ᐱᐅᓯᕆᕙᑦᑕᖏᑦ ᐋᖅᑭᒋᐊᖁᓪᓗᒋᑦ: ᐃᒫᒃ, ᓇᓗᓇᐃᕐᓯᑎᐊᕐᓗᑎᒃ ᐃᑲᔫᑎᖏᑦ ᐊᑐᖅᑎᑕᐅᖃᑦᑕᓂᐊᕐᖓᑕ ᑕᐃᒫᒃ ᐱᔭᕆᐊᖃᕐᑕ ᒪᓕᓪᓗᑎᒃ ᓯᕗᓂᔅᓴᑎᓐᓂ, ᑕᒪᒃᑮᓐᓂᒃ ᓂᐅᕕᖅᑎᑯᓐᓂᒃ The North West Company ᐊᒻᒪᓗ ᓂᐅᕕᕐᕈᑎᒋᕙᑦᑕᖏᓐᓂᒃ. 

JFK Law LLP ᐊᒻᒪᓗ Siskinds LLP (ᑕᒪᕐᒥᒃ, “ᑲᑐᔾᔨᖃᑎᒌᑦᑐᓄᑦ ᒪᓕᒐᓕᕆᔩᑦ”) ᑭᒡᒐᖅᑐᐃᔪᑦ ᐸᓯᔭᔅᓴᕈᖅᑎᑦᑎᓯᒪᔪᓂᑦ. ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᓇᓱᐊᕈᑕᐅᔪᖅ ᓇᓗᓇᐃᖅᑕᐅᑉᐸᑦ, JFK Law ᐊᒻᒪᓗ Siskinds ᒪᓕᒐᓕᕆᔩᑦ ᑭᒡᒐᖅᑐᐃᓂᐊᕐᒥᔪᑦ ᐃᓚᒋᔭᐅᓂᕋᖅᑕᐅᓯᒪᔪᓂᑦ.

JFK Law ᐊᓪᓚᕝᕕᖃᐅᖅᑐᑦ ᐅᑯᓇᓂ ᐱᖓᓲᔪᖅᑐᓂᑦ ᓄᓇᖅᑲᑎᒌᑦᑐᒡᒍᑎᓂᑦ, ᕕᒃᑐᐊᕆᐊ, ᕚᓐᑰᕙ, ᑐᕌᓐᑐ, ᐊᒻᒪᓗ ᑳᓪᒍᕆ. JFK Law ᑭᒡᒐᖅᑐᐃᔪᑦ ᓄᓇᖃᖅᑳᖅᑐᓂᑦ ᓄᓇᓕᓐᓂᑦ ᑲᓇᑕᒥ. JFK ᒪᓕᒐᓕᕆᔩᑦ ᓴᐳᓐᓂᐊᖅᑏᑦ ᑲᒪᒋᔭᓖᑦ ᑖᒃᑯᓂᖓ ᐅᑯᐊᖑᕗᑦ ᑎᒻ ᑎᒃᓴᓐ, ᑎᒻ ᐳᕆᑦᓱᑦ, ᐊᒻᒪᓗ ᔨᐊᓯᑲ ᕙᓛᒃ.

Siskinds ᒪᓕᒐᓕᕆᔩᑦ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᓇᓱᐊᖅᑐᓂᑦ ᑲᒪᒋᔭᓖᑦ ᐊᓪᓚᕝᕕᓖᑦ ᐅᑯᓇᓂ ᕚᓐᑰᕙ, ᑐᕌᓐᑐ, ᓚᓐᑕᓐ, ᐊᒻᒪᓗ ᓵᓂᐊ, ᐊᒻᒪᓗ ᐊᓪᓚᕝᕕᖁᑎᖃᕆᓪᓗᑎᒃ ᑯᐸᐃᒃ ᓯᑎᒥ, ᐊᒻᒪᓗ ᑲᒪᒋᔭᖃᓗᐊᓲᑦ ᐸᓯᔭᔅᓴᕈᖅᑎᑦᑎᓯᒪᔪᓂᑦ. ᑖᒃᑯᐊ Siskinds ᒪᓕᒐᓕᕆᔩᑦ ᑲᒪᒋᔭᓖᑦ ᑕᒪᑐᒥᖓ ᐅᑯᐊᖑᕗᑦ ᓕᓐᑕ ᕕᓱ, ᐋᓕ ᑎᒻᓴᓐ, ᑕᐃᓗ ᐸᓚᓂᑕ, ᐊᒻᒪᓗ ᔪᐊᔾᔭ Hᐊᒪᓪᑕᓐ. 

ᐋᒡᒐ−ᐊᑭᖃᙱᑦᑐᖅ ᐃᓚᒋᔭᐅᓂᕋᖅᑕᐅᓯᒪᔪᓄᑦ ᐃᓚᒋᔭᐅᓂᕋᖅᑕᐅᔪᓄᑦ ᐃᓚᒋᔭᐅᔪᒪᑉᐸᑕ ᑖᔅᓱᒥᖓ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᓇᓱᐊᕈᑕᐅᔪᒥᒃ. ᑲᑐᔾᔨᖃᑎᒌᑦᑐᓄᑦ ᒪᓕᒐᓕᕆᔩᑦ ᐊᑭᓖᓂᐊᖅᑐᑦ ᑕᒪᕐᒥᒃ ᐊᑭᖏᓐᓂᒃ ᑕᒪᑐᒧᖓ ᑐᕌᖓᔪᓂᑦ ᐃᖅᑲᖅᑐᐃᕕᒃᑰᑎᑦᑎᒍᑕᐅᓇᓱᑦᑎᓪᓗᒍ ᑖᓐᓇ. 

ᑲᑐᔾᔨᖃᑎᒌᑦᑐᓄᑦ ᒪᓕᒐᓕᕆᔩᑦ ᐊᑭᓕᖅᑕᐅᒐᔭᖅᑐᑦ ᐱᔭᕇᖅᑲᑕ ᒪᓕᑦᑐᒋᑦ ᖃᓄᐃᓐᓂᐅᔪᑦ, ᐃᒫᒃ ᑐᑭᓕᒃ ᐊᑭᓕᖅᑕᐅᔾᔮᖏᑦᑐᑦ ᑭᓯᐊᓂ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᓇᓱᐊᕈᑕᐅᔪᖅ ᓵᓚᔅᓴᕈᑕᐅᑉᐸᑦ, ᐊᒻᒪᓗ ᐃᓚᒋᔭᐅᓂᕋᖅᑕᐅᔪᑦ ᐊᑭᓕᖅᑕᐅᑉᐸᑕ ᑮᓇᐅᔭᓂᑦ ᓵᓚᔅᓴᕈᑎᖏᓐᓂᒃ. ᒪᓕᒐᓕᕆᔨᖃᕐᓂᕐᒧᑦ ᐊᖏᖃᑎᒌᒍᑎᖓ ᐃᒪᐃᓕᖓᔪᖅ ᐱᔭᕇᖅᑲᑕ ᐊᑭᒋᓂᐊᖅᑕᖓ ᑐᑭᓯᔭᐅᓛᕐᒥᔪᖅ ᒪᓕᑦᑐᒋᑦ ᖃᑦᑎᐅᓂᖏᑦ ᓈᒻᒪᓪᓗᑎᒃ ᐊᒻᒪᓗ ᓈᒻᒪᔾᔫᒥᓗᑎᒃ, ᐃᓱᒪᒋᓪᓗᒋᑦ, ᐊᓯᖏᑦ ᑕᒪᒃᑯᐊᖑᒐᓗᐊᕐᒥᑎᓪᓗᒋᑦ, ᐃᓱᒫᓗᓇᖅᑐᒃᑰᕐᓯᒪᑎᓪᓗᒋᑦ ᒪᓕᒐᓕᕆᔩᑦ, ᐊᑐᓯᔪᑦ ᒪᓕᑦᑐᒋᑦ ᑲᑐᔾᔨᖃᑎᒌᑦᑐᓄᑦ, ᐊᒻᒪᓗ ᖃᓄᑎᒋᒃ ᑲᒪᒋᔭᐅᓂᕆᓚᐅᖅᑕᖓᓄᑦ ᐊᒻᒪᓗ ᐱᓇᓱᐊᕈᑕᐅᓚᐅᕐᓂᖓᓄᑦ ᑲᑐᔾᔨᖃᑎᒌᑐᓄᑦ ᒪᓕᒐᓕᕆᔨᓄᑦ. ᒪᓕᒐᓕᕆᔨᖃᕐᓂᕐᒧᑦ ᐊᖏᖃᑎᒌᒍᑎᖏᑦ ᐃᒪᐃᓕᖓᒻᒪᑕ ᐱᔭᕇᖅᑲᑕ ᐊᑭᒋᓂᐊᖅᑕᖓ ᐅᖓᑖᓃᔾᔮᖏᒻᒪᑕ 25%ᖏᑕ ᐅᑎᖅᑎᑦᑎᒍᑕᐅᓇᓱᑦᑐᑦ ᐃᖅᑲᖅᑐᐃᕕᒃᑰᓚᐅᖅᑎᓐᓇᒋᑦ ᐅᕝᕙᓘᓐᓃᑦ 30% ᐅᖓᑖᓃᔾᔮᖏᒻᒪᑕ ᐱᒋᐊᕐᓯᒪᓕᖅᑎᓪᓗᒍ ᐃᖅᑲᖅᑐᐃᕕᒃᑰᑎᑦᑎᓂᖅ.  

ᐃᖅᑲᖅᑐᐃᕕᒃᑰᑎᑦᑎᒍᒪᓯᒪᔪᑦ ᑎᑎᕋᖅᑕᐅᑎᑦᑎᓚᐅᕐᓯᒪᔪᑦ ᓇᓗᓇᐃᕐᓯᒍᑎᖏᓐᓂᒃ ᐃᖅᑲᖅᑐᐃᕕᒃᑰᑎᑦᑎᒍᒪᓂᕐᒧᑦ−ᒪᓕᒐᖅᑎᒍᑦ ᑎᑎᖅᑲᓂᑦ ᐃᖅᑲᖅᑐᐃᕕᒻᒥ ᑲᒪᒋᔭᐅᓂᐊᕐᓂᖓᓂᒃ ᐱᒋᐊᖅᑎᑦᑎᓯᒪᔪᒥᒃ−ᒫᓂᑑᕙᒥ ᕖᕝᕗᐊᓕ 5, 2025ᖑᑎᓪᓗᒍ. 

ᑲᒪᒋᔭᖃᕐᓂᐊᓕᕐᒥᔪᑦ ᑕᒪᑐᒥᖓ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᓇᓱᐊᕈᑕᐅᔪᒥ ᐃᒫᒃ ᑕᐃᔭᐅᔪᒥ “ᓇᓗᓇᐃᒃᑯᓯᖅᓯᓂᖅ”. ᓇᓗᓇᐃᒃᑯᓯᖅᓯᓂᖅ ᐊᑐᖅᑕᐅᓲᖅ ᑲᒪᒋᔭᖃᖅᑎᓪᓗᒋᑦ ᐃᖅᑲᖅᑐᐃᕕᒃ ᑐᑭᑖᕈᑎᖃᕐᓂᐊᖅᑐᖅ ᑖᓐᓇ ᐱᓇᓱᐊᕈᑕᐅᔪᓐᓇᓂᐊᕐᒪᖔᖅ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᓇᓱᐊᕈᑎᒋᓗᒍ. ᐃᖅᑲᖅᑐᐃᕕᒃ ᐃᓱᒪᒋᔭᖃᕆᐊᕐᓂᐊᕐᖓᑕ ᐱᔾᔪᑕᐅᔪᓂᑦ ᓲᕐᓗ ᐸᓯᔭᔅᓴᐅᓂᕋᐃᔾᔪᑕᐅᔪᑦ ᑲᑐᔾᔨᓪᓗᑎᒃ ᐃᓚᒋᔭᐅᔪᓂᑦ ᐊᑐᖅᑕᐅᒐᔪᑦᑐᓂᑦ ᒪᓕᒐᖅᑎᒍᑦ ᐊᒻᒪᓗ/ᐅᕝᕙᓘᓐᓃᑦ ᐱᔾᔪᑕᐅᔪᓂᑦ ᐊᑲᐅᙱᓕᐅᕈᑕᐅᔪᓂᑦ ᐱᔾᔪᑎᖃᕐᒪᖔᑕ ᐊᒻᒪᓗ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᓇᓱᐊᕈᑕᐅᔪᖅ ᑖᓐᓇ ᐊᑐᕐᓗᒍ ᑕᐃᒫᒃ ᐱᐅᓂᐊᕐᒪᖔᖅ ᐊᑭᓖᑎᑦᑎᒐᓱᓪᓗᓂ (ᐃᓱᒪᒋᓪᓗᒋᑦ ᐊᓯᖏᑦ ᐱᐅᓯᕆᔭᐅᓲᑦ, ᓲᕐᓗ ᐊᑐᓂᑦ ᐃᖅᑲᖅᑐᐃᕕᒃᑰᑎᑦᑎᒍᑕᐅᓲᑦ). ᐃᖅᑲᖅᑐᐃᕕᒃ ᖃᐅᔨᓴᕐᓂᐊᕐᒥᔪᖅ ᐃᖅᑲᖅᑐᕋᔅᓴᐅᖁᔨᓯᒪᔪᑦ ᑭᒡᒐᖅᑐᐃᑦᑎᐊᕈᓐᓇᓂᐊᕐᒪᖔᑕ ᐃᓚᒋᔭᐅᓂᕋᖅᑕᖏᓐᓂᒃ. ᐃᑲᔪᕈᓐᓇᓂᐊᕐᖓᑕ ᑐᔅᓯᕋᐅᑕᐅᓯᒪᔪᓂᑦ ᑭᒡᒐᖅᑐᐃᓂᕐᒧᑦ ᐃᖅᑲᖅᑐᕋᔅᓴᐅᖁᔨᓯᒪᔪᓂᑦ ᐃᖅᑲᓇᐃᔮᖏᓐᓂ, ᐃᓱᒪᒋᔭᖃᖅᑐᒍᑦ ᐋᖅᑮᒍᒪᒐᔭᕆᐊᔅᓴᖅ ᐅᖃᐅᔾᔨᒋᐊᖅᑎᐅᓂᐊᖅᑐᓂᑦ ᑲᑎᒪᔨᕋᓛᕐᓂᑦ ᐅᑭᐅᖅᑕᖅᑐᒥᐅᖑᓗᑎᒃ.

“ᓇᓗᓇᐃᒃᑯᑕᖅ” ᐊᑑᑎᖃᕐᓂᕐᐹᖑᕗᖅ ᑲᒪᒋᔭᖓᓐᓂ ᐃᖅᑲᖅᑐᐃᕕᒃᑰᑎᑦᑎᒍᑕᐅᔪᒥ−ᑖᓐᓇ ᐱᔾᔪᑕᐅᔪᖅ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᒍᑕᐅᓕᔾᔮᖏᒻᒪᑦ ᑲᑐᔾᔨᖃᑎᒌᑦᑐᓄᑦ ᑭᓯᐊᓂ ᑕᐃᔭᐅᓕᖅᑲᑦ ᐃᒫᒃ “ᓇᓗᓇᐃᖅᑕᐅᓯᒪᔪᖅ” ᒫᓂᑑᕙᒥ ᐃᖅᑲᖅᑐᐃᕕᒻᒧᑦ. 

ᑖᓐᓇ ᐊᑐᙱᑦᑐᖅ “ᐃᓚᐅᓕᕆᐊᖃᕐᓂᕐᒥᒃ” ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᒍᑕᐅᔪᒪᔪᖅ. ᐃᖅᑲᖅᑐᐃᕕᒃᑰᑎᑦᑎᒍᑕᐅᔪᒪᔪᖅ ᓇᓗᓇᐃᒃᑯᓯᖅᑕᐅᑉᐸᑦ, ᐊᒻᒪᓗ ᐃᓚᒋᔭᐅᔪᓐᓇᕈᕕᑦ ᑖᒃᑯᓄᖓ ᑲᑐᔾᔨᖃᑎᒌᖑᓂᕋᖅᑕᐅᔪᓄᑦ (ᓲᕐᓗ ᐃᒫᒃ, ᑕᒪᕐᒥᒃ ᐃᓄᓕᒫᑦ ᐊᒻᒪᓗ ᑎᒥᐅᔪᑦ ᓂᐅᕕᖃᑦᑕᕐᓯᒪᔪᑦ ᓂᐅᕕᐊᔅᓴᓂᑦ ᐊᑭᑭᓪᓕᒋᐊᕐᓯᒪᔪᓐᓇᕐᓯᒪᔪᓂᑦ ᓂᕿᑦᑎᐊᕙᓕᕆᓂᕐᒧᑦ ᐅᑭᐅᖅᑕᖅᑐᒥ ᐃᑲᔫᑎᑎᒍᑦ ᑖᒃᑯᓇᙵᑦ ᓂᐅᕕᖅᑎᑯᓐᓂᑦ The North West Company ᐊᒻᒪᓗ ᑎᒥᖁᑎᖏᓐᓂᒃ (ᐅᑯᐊ ᐃᓚᒋᔭᐅᓪᓗᑎᒃ, ᑭᓪᓕᖃᕋᓂ, Northern Stores, NorthMart, Valu Lots, ᐊᒻᒪᓗ QuickStop) ᐄᐳᓗ 1, 2011ᒥ ᒫᓐᓇᒧᑦ ᑎᑭᑦᑐᒍ), ᐃᓚᒋᔭᐅᓯᑦᑕᐅᑎᒋᓂᐊᖅᑐᑎᑦ ᑲᑐᔾᔨᓪᓗᑎᒃ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᓇᓱᐊᕈᑕᐅᔪᒥ ᑭᓯᐊᓂ ᑕᐃᒪ “ᐃᓚᒋᔭᐅᔪᒪᙱᒃᑯᕕᑦ” ᐃᓚᒋᔭᐅᙱᒍᓐᓇᖅᑐᑦ. ᓲᕐᓗ ᐃᒫᒃ, ᐃᓚᒋᔭᐅᑎᙱᓪᓗᑎᑦ ᑲᑐᔾᔨᓪᓗᑎᒃ ᐃᖅᑲᖅᑐᐃᕕᒃᑰᑎᑦᑎᔪᓄᑦ).

ᑲᑐᔾᔨᓪᓗᑎᒃ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᔪᒪᔪᑦ ᓇᓗᓇᐃᖅᑕᐅᑉᐸᑦ, ᖃᐅᔨᐃᒃᑲᐃᓕᕋᔭᖅᑐᑦ ᑲᑐᔾᔨᓪᓗᑎᒃ ᐃᓚᒋᔭᐅᔪᓄᑦ ᑎᑎᕋᖅᑕᐅᓯᒪᓗᑎᒃ ᐊᖏᖅᑕᐅᓯᒪᓂᖓᓂᒃ ᐃᖅᑲᖅᑐᐃᕕᒻᒧᑦ. 

ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᒍᑕᐅᔪᒪᔪᖅ ᓇᓗᓇᐃᒃᑯᓯᖅᑕᐅᑉᐸᑦ, ᐱᕕᖃᕐᓂᐊᖅᑐᑎᑦ ᐃᓚᒋᔭᐅᙱᒍᓐᓇᓂᕐᒧᑦ (ᓲᕐᓗ ᐃᒫᒃ, ᐃᓚᒋᔭᐅᑎᒍᓐᓃᕐᓗᑎᑦ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᓂᐊᖅᑐᓄᑦ). ᐃᖅᑲᖅᑐᐃᕕᒃ ᐋᖅᑮᒐᔭᖅᑐᖅ ᒪᑐᕕᔅᓴᖓᓂᒃ, ᐊᒻᒪᓗ ᐃᓚᒋᔭᐅᒍᓐᓃᖅᑎᒍᓐᓇᖅᑐᑎᑦ ᓯᕗᕐᖓᒍᑦ ᒪᑐᕕᔅᓴᖓᑕ. ᐃᓚᒋᔭᐅᔾᔮᖏᒃᑯᕕᑦ, ᐊᑭᓕᖅᑕᐅᖃᑕᐅᔪᓐᓇᔾᔮᓛᙱᑦᑐᑎᑦ ᐊᑭᓕᐅᑕᐅᓂᐊᖅᑐᓂᑦ ᐋᖅᑮᓚᐅᖅᑎᓪᓗᒋᑦ ᐊᖏᖃᑎᒌᒍᑎᖏᑎᒍᑦ ᐅᕝᕙᓘᓐᓃᑦ ᐃᖅᑲᖅᑐᐃᕕᒻᒥ ᐱᖁᔭᓕᐅᕈᑕᐅᑉᐸᑦ. ᐃᒪᐃᒍᓐᓇᖅᑐᑎᑦ, ᑭᓯᐊᓂᓕ, ᐱᓇᓱᐊᕈᑎᖃᕈᓐᓇᖅᑐᑎᑦ ᓇᒻᒥᓂᖅ ᖃᓄᖅᑑᕈᑎᒋᓂᐊᖅᑕᕐᓂᒃ ᐊᑭᕋᖅᑐᕐᓗᒋᑦ ᐸᓯᔭᔅᓴᓕᐊᖑᓯᒪᔪᑦ.

ᐅᓇ ᐊᑐᖅᑕᐅᒐᔪᓲᖅ, ᑭᒃᑯᑐᐃᓐᓇᐃᑦ ᑲᑐᔾᔨᖃᑎᒌᑦᑐᓂᑦ ᐃᓚᒋᔭᐅᔪᓐᓇᖅᑐᑦ ᑭᓯᐊᓂ ᐃᓚᒋᔭᐅᙱᒍᒪᒍᓐᓇᖅᑐᑦ ᓇᒻᒥᓂᖅ ᖃᓄᖅᑑᕈᑎᖃᕐᓂᐊᖅᑲᑕ ᑭᓯᐊᓂ. ᐊᒥᓱᓂᑦ ᐊᑐᖅᑕᐅᕙᑦᑐᓂᑦ, ᑕᐃᒪᐃᑦᑑᒐᓗᐊᖅᑎᓪᓗᒍ, ᐱᐅᓂᕐᓴᐅᒐᔭᖅᑐᖅ ᐃᓚᒋᔭᐅᒍᕕᑦ ᑲᑐᔾᔨᓪᓗᑎᒃ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᒐᓱᐊᕈᑎᓕᓐᓂᑦ ᐱᔾᔪᑎᒋᓪᓗᒋᑦ ᒪᓕᒐᖅᑎᒍᑦ ᐊᑭᖏᑦ ᑲᑐᔾᔭᐅᓂᐊᕐᖓᑕ ᐊᒥᓱᓂᑦ ᑭᒃᑯᑐᐃᓐᓇᕐᓂᑦ. 

ᓴᐳᔾᔨᔪᒪᒍᕕᑦ ᐱᔪᓐᓇᐅᑎᓂᒃ, ᐃᒪᐃᓕᐅᕆᐊᖃᖅᑯᑎᑦ:

1)    ᐊᑎᓕᐅᕐᓗᑎᑦ ᖃᐅᔨᖃᑦᑕᕐᓂᐊᕋᕕᑦ ᖃᓄᐃᓕᐅᕐᐸᓪᓕᐊᓂᖏᓐᓂᒃ ᑕᒪᑐᒥᖓ ᐃᖅᑲᖅᑐᐃᕕᒃᑯᑦ ᑲᑐᔾᔨᓪᓗᑎᒃ ᐊᑭᓖᑎᑦᑎᒍᑕᐅᓇᓱᑦᑐᒥ. 

2)    ᕿᒥᕐᕈᓗᒋᑦ ᑕᒪᕐᒥᒃ ᖃᓄᐃᓕᐅᕐᐸᓪᓕᐊᒍᑕᐅᓯᒪᔪᓂᑦ ᑐᑭᓯᑎᑦᑎᒋᐊᕈᑕᐅᓯᒪᔪᑦ, ᐅᔾᔨᕆᒋᐊᑦᑎᐊᕐᓗᒋᑦ ᒪᑐᕕᔅᓴᖏᑦ ᖃᓄᐃᓕᐅᕈᑕᐅᔭᕆᐊᓖᑦ. ᖃᐅᔨᒃᑲᐃᔾᔪᑏᑦ ᓇᔅᓯᐅᔾᔭᐅᒐᔭᖅᑐᑦ ᑲᑐᔾᔨᓪᓗᑎᒃ ᐃᓚᒋᔭᐅᔪᓄᑦ ᐅᖃᐅᔾᔭᐅᒋᐊᕐᓗᑎᒃ ᑲᒪᒋᔭᖃᕆᐊᖃᕐᓂᐊᕐᓂᖏᓐᓂᒃ ᒪᑐᕕᔅᓴᖏᑦ ᒪᓕᓪᓗᒋᑦ ᐱᔪᓐᓇᐅᑎᖏᓐᓂᒃ ᐊᑐᕈᒪᒍᑎᒃ. ᑖᒃᑯᐊ ᒪᑐᕕᔅᓴᖏᑦ ᐋᖅᑭᑦᑕᐅᓯᒪᒐᔪᓲᑦ ᐃᖅᑲᖅᑐᐃᕕᒻᒥᑦ ᐊᒻᒪᓗ ᒪᓕᑦᑕᐅᔭᕆᐊᖃᓲᖑᓪᓗᑎᒃ. 

ᑲᑐᔾᔨᔪᓄᑦ ᒪᓕᒐᓕᕆᔩᑦ ᐃᓱᒪᒻᒪᑕ ᐋᖅᑮᒐᔭᕆᐊᔅᓴᖅ ᐅᖃᐅᔾᔨᒋᐊᖅᑎᓂᑦ ᑲᑎᒪᔨᕋᓛᕐᓂᑦ ᐅᑭᐅᖅᑕᖅᑐᒥᐅᖑᓗᑎᒃ ᐃᑲᔪᕋᔭᖅᑐᓂᒃ ᑭᒡᒐᖅᑐᐃᔪᓂᒃ ᐃᖅᑲᖅᑐᐃᕕᒃᑰᑎᑦᑎᔪᓂᒃ ᐃᖅᑲᓇᐃᔮᖏᓐᓂᒃ. ᐃᓚᒋᔭᐅᔪᒪᒍᕕᑦ ᐅᖃᐅᔾᔨᒋᐊᖅᑎᓂᑦ ᑲᑎᒪᔨᕋᓛᕐᓂᑦ, ᐊᑏ ᐅᖃᕐᕕᖃᕐᓂᐊᖅᑯᑎᑦ ᐅᕙᒍᑦ ᐃᖅᑲᓇᐃᔭᖃᑎᖓᑕ ᐃᓚᖓᓐᓂᒃ. 

ᐊᑏ ᐅᖃᕐᕕᐅᖃᑦᑕᓂᐊᖅᑯᒍᑦ ᑐᑭᓯᒃᑲᓐᓂᕈᒪᒐᐃᒍᔅᓯ.